Wanafunzi UDOM waaswa kuishi kwa kuzingatia maadili

Imewekwa tarehe: November 26th, 2022

NAIBU Waziri, Ofisi ya Rais, Menejimenti ya Utumishi wa Umma na Utawala Bora, Mhe. Deogratius Ndejembi amewataka wanafunzi wa Chuo Kikuu cha Dodoma (UDOM) kuishi kwa kuzingatia maadili ya kitanzania ili kutimiza malengo yao kitaaluma na kujenga taswira nzuri ya chuo katika jamii.

Ndejembi ametoa nasaha hizo jijini Dodoma, wakati akifunga Kongamano la Kukuza Maadili na Elimu ya Mapambano Dhidi ya Rushwa kwa wanafunzi na wafanyakazi wa chuo hicho lililofanyika katika ukumbi wa Chimwaga.

Ndejembi amesema kuwa Serikali ya Awamu ya Sita imejipambanua kusimamia utawala bora, kuzingatia maadili na ndio maana inapinga vitendo vya rushwa hivyo, wanafunzi wa UDOM wanapaswa kuzingatia maadili mema kwa lengo la kujenga taswira nzuri ya chuo, ikiwa ni sehemu ya kuunga mkono jitihada za Mhe. Rais Samia Suluhu Hassan za kujenga taifa lenye uadilifu.

"Mnapaswa kuishi kwa kuzingatia maadili ya Kiafrika na Kitanzania kwa sababu tabia zote mbaya mtakazozifanya, jamii haitowaelewa na itakishushia hadhi Chuo Kikuu cha Dodoma ambacho Serikali inakitegemea katika kuzalisha rasilimaliwatu yenye tija katika maendeleo ya taifa," Ndejembi amesisitiza.

Ndejembi amefafanua kuwa, hata chuo kikiendelea kuwa na matokeo mazuri ya wanafunzi kwa kiwango kikubwa lakini wanafunzi na watumishi wa chuo wasipoishi kwa kuzingatia maadili itakuwa ni sawa na kazi bure kwani hakitakuwa na hadhi mbele ya jamii.

Aidha, Mhe. Ndejembi amewataka wanafunzi wa Chuo Kikuu cha Dodoma kuwa mabalozi wazuri wa kupinga vitendo vya rushwa katika kipindi chote wanapokuwa chuoni na hata baada ya kuhitimu.

Ndejembi amewataka washiriki wa kongamano hilo, kuhakikisha wanafanya mjadala utakaolenga kulinda na kukuza maadili kwa maslahi mapana na mustakabali wa maendeleo ya taifa.