Wasafirishaji wa abiria watakiwa kutoa tiketi za kielektroniki

Imewekwa tarehe: January 5th, 2021

Mamlaka ya Udhibiti Usafiri wa Ardhini (LATRA) imetangaza kuanza kwa matumizi ya Tiketi za Kieletroniki kwenye mabasi yanayokwenda mikoani na kwa watakaoshindwa kufanya hivyo wametakiwa kusitisha utoaji huduma kabla ya kuchukuliwa hatua za kisheria.

Katika taarifa yake Mamlaka imewaagiza wasafirishaji wote wa abiria kwa mabasi kuzingatia masharti ya leseni za usafirishaji na matakwa ya kanuni za leseni za usafirishaji – Magari ya Abiria zilizotangazwa kwa tangazo Na. 76 kwenye gazeti la Serikali Februari 7, 2020.

Maamuzi haya yanasimamiwa na Kanuni ya 4 (2) (c); Leseni ya kusafirisha abiria itatolewa kwa muombaji aliyesajiliwa kwenye mfumo wa tiketi za kielektroniki ulioidhinishwa na Mamlaka.

Pia, Kanuni ya 24 (b) (d); Msafirishaji mwenye leseni ya kusafirisha abiria wa masafa marefu ahakikishe anatoa tiketi za kielektroniki kwa abiria.

Mamlaka imewataka wasafirishaji watoe tiketi za kielektroniki kama kanuni zinavyoelekeza. Hivyo basi kuanzia tarehe 6 Januari, 2021 hakuna msafirishaji atakayeruhusiwa kusafirisha abiria bila kutoa tiketi za kielektroniki kwa abiria wote katika njia zifuatazo:

Dar es Salaam – Tanga

Tanga – Arusha

Dar es Salaam – Lindi

Dar es Salaam – Mtwara

Dar es Salaam – Iringa

Dar es Salaam – Njombe

Dar es Salaam – Ruvuma

Dar es Salaam – Mbeya

Dar es Salaam – Tunduma

Dar es Salaam – Rukwa

Dar es Salaam – Morogoro

Dar es Salaam – Kilombero

Dar es Salaam – Ifakara

Dar es Salaam – Malinyi

Dar es Salaam – Mahenge

LATRA imesema katika taarifa yake kuwa, kupitia mfumo huu, Wananchi watatumia simu kukata tiketi jambo litakaloepusha wizi, ulanguzi wa tiketi na adha za wapiga debe. Vilevile, unalenga kukomesha vitendo vya upandishaji holela wa nauli hasa kipindi cha sikukuu za mwisho wa mwaka.