Serikali kujenga Hospitali ya Taifa ya Mama na Mtoto Dodoma

Imewekwa tarehe: May 16th, 2022

SERIKALI imetenga kiasi cha shilingi Bilioni 10 kwa ajili ya kujenga Hospitali ya Taifa ya Magonjwa ya Mama na Mtoto Jijini Dodoma ili kuimarisha huduma za tiba kwa magonjwa ya wanawake na watoto.

Hayo yamesemwa na Waziri wa Afya Mhe. Ummy Mwalimu alipokuwa akiwasilisha hotuba ya bajeti ya Wizara ya Afya kuhusu makadirio ya mapato na matumizi ya fedha ya Wizara yake kwa mwaka wa fedha 2022/23 leo Jumatatu tarehe 16/05/2022 Bungeni Jijini Dodoma.

Waziri Ummy alikuwa amefafanua juu ya utekelezaji wa vipaumbele vilivyoainishwa katika bajeti ya mwaka 2022/23. Amesema kuwa Wizara ya Afya imejipanga kuendelea kutekeleza miradi mbalimbali ya maendeleo nchini ukiwemo huo wa ujenzi wa hospitali ya mama na mtoto.

Waziri Ummy amevitaja vipaumbele ilivyojiwekea Wizara ya Afya katika mwaka wa fedha 2022/23 ili kuboresha huduma za afya nchini ni kama vifuatavyo: -

1. Kuimarisha utoaji wa huduma za chanjo kwa watoto walio chini ya umri wa miaka mitano;
2. Kusimamia viwango vya ubora wa huduma za kinga na tiba katika ngazi zote za utoaji huduma za afya nchini;
3. Kuimarisha huduma za afya ya uzazi, mama na mtoto ili kupunguza vifo vitokanavyo na uzazi, vifo vya watoto wachanga pamoja na mimba za utotoni,
4. Kuimarisha upatikanaji wa dawa, vifaa, vifaa tiba na vitendanishi katika ngazi zote za utoaji wa huduma za afya
5. Kuimarisha huduma za lishe hususani kwa watoto wa umri wa chini ya miaka 5, vijana balehe na wanawake wa umri wa kuzaa;
6. Kuimarisha huduma za afya na usafi wa mazingira ili kudhibiti magonjwa ya kuambukizi na hivyo kupunguza idadi ya wagonjwa katika vituo vya kutolea huduma za afya nchini;
7. Kuimarisha miundombinu ya kutolea huduma za afya ikiwemo katika Hospitali za Rufaa za Mikoa, Kanda, Maalum na Taifa;
8. Kuimarisha huduma za matibabu ya ubingwa na ubingwa bobezi;
9. Kudhibiti magonjwa ya mlipuko, magonjwa ya kuambukiza na magonjwa yasiyo ya kuambukiza;
10. Kuimarisha utoaji wa mafunzo ya wataalamu katika Sekta ya Afya;
11. Kuimarisha mifumo ya ugharamiaji wa huduma za afya nchini;
12. Kuimarisha utawala bora na uwajibikaji katika utoaji huduma za afya; na
13. Kuimarisha mifumo ya TEHAMA na matumizi ya takwimu katika utoaji wa huduma za afya nchini.