Waziri Jafo aziagiza Halmashauri zote nchini kuwa wabunifu wa miradi ya maendeleo kama Jiji la Dodoma

Imewekwa tarehe: August 28th, 2019

Waziri wa Nchi Ofisi ya Rais Tawala za Mikoa na Serikali za Mitaa Mhe. Selemani Jafo ameziagiza Halmashauri zote nchini kuhakikisha wanaweka mikakati kwa kubuni miradi ambayo itawasaidia kwa kujiwekea vitega uchumi na kukuza mapato katika Halmashauri zao ili kuachana na utegemezi katika Serikali.

Mhe. Jafo amezitaka Halmashauri zote nchini kuiga mfano wa Halmashauri ya Jiji la Dodoma kwa kubuni Miradi ya Maendeleo kwa ajili ya vitega uchumi na kuondokana na utegemezi kwa Serikali.

Waziri ameyasema hayo jana wakati wa utiaji wa saini Miradi ya Ujenzi wa majengo mawili ya vitega uchumi vya Halmashauri ya Jiji la Dodoma uliofanyika katika Viwanja vya Nyerere Square, Jijini Dodoma.

Aidha, Waziri Jafo ameupongeza uongozi wa Jiji la Dodoma akiwemo Mstahiki Meya Prof. Davis Mwamfupe, Mkurugenzi Godwin Kunambi, Madiwani, Wakuu wa Idara na Vitengo na watumishi wote wa Halmashauri ya Jiji la Dodoma kwa kazi na utendaji mzuri wenye kuleta matokeo chanya kwa maendeleo ya Jiji la Dodoma na Taifa kwa ujumla.

Kwa habari zaidi bofya hapa: Halmashauri igeni Dodoma Jiji

Chanzo: tovuti ya www.tamisemi.go.tz