Yaliyojiri kikao cha JPM na Watendaji wa Kata jana Ikulu Dar es salaam

Imewekwa tarehe: September 3rd, 2019

Dondoo za Rais Dkt. John Pombe Magufuli kwa Watendaji wa Kata takribani 3,800 nchini aliowaita Ikulu jijini Dar es salaam jana 02 Septemba, 2019:-

• Nawahakikishia kuwa cheo cha Afisa Mtendaji Kata siyo kidogo, ninyi ni wawakilishi wangu na nawahakikishieni tembeeni vifua mbele na kamwe asitokee mtu wa kuwanyanyasa huko mliko.
• Nimewaita tusalimiane, tujadiliane namna bora ya kutimiza wajibu wenu katika maeneo yenu mnakotoka, sina hakika katika maisha yenu kama mmeshawahi kuitwa na Wakuu wa Wilaya ama Wakurugenzi wa Halmashauri, kujadili kwa pamoja utendaji kazi wenu.
• Najua mmekua mkionewa, mmekua mkihamishwa hovyo hovyo kwa utashi wa wakubwa wenu na nasema ni marufuku kwa Afisa Mtendaji Kata kuhamishwa bila kufuata taratibu.
• Hiki ni kikao muhimu sana ndiyo maana nataka tuzungumze na kujadiliana juu ya utekelezaji wa majukumu yenu ya kila siku kwakua ninyi ndiyo mko karibu na wananchi na hakuna anayezielewa na kuzijua changamoto za Vijiji na Kata nchini zaidi yenu.
• Mna majukumu ikiwemo kuhakikisha usalama katika maeneo yenu, amani ndiyo msingi wa maendeleo lakini nasistiza hususani kwa kata zilizoko mpakani, watambueni wageni wanaoingia mipakani na hakikisheni hawapati vitambulisho vya uraia ambavyo zoezi la kuvitoa kwa wananchi linaendelea.
• Kutatua kero za wananchi ni jukumu lenu lingine, jiwekeeni utaratibu wa kukutana na wananchi na siyo kusubiri wananchi wabebe mabango wakati wa ziara ya Rais na kama hamtasikiliza na kutatua kero za wananchi uwepo wenu katika maeneo yenu hautakua na maana.
• Kusimamia miradi ya maendeleo inayotekelezwa katika kata zenu ni jukumu lenu na kamwe msikubali mradi kutekelezwa chini ya kiwango kwani na wewe utahusika, wewe ni bosi hupaswi kukaa pembeni wakati pesa zinachezewa.
• Natoa rai kwa baadhi yenu, taarifa ninazo acheni kua madalali wa  kuuza ardhi kwani ndio chanzo cha migogoro ya ardhi nchini, acheni kujihusisha na vitendo vya rushwa na dhuluma, mnabambikia wananchi kesi, hamna huruma hata kwa wajane na yatima.
• Siku zote mtangulizeni Mungu, mnaposhughulika na maisha ya wananchi, mkumbuke maisha mliyoanza nayo.
• Nitasikitika sana baada ya kikao hiki Afisa niliyemteua akaenda kumnyanyasa kwa makusudi Afisa Mtendaji Kata nitamuona hatoshi  lakini pia nitashangaa Mtendaji Kata kuwaonea wananchi wanyonge pia nitamuona hatoshi lakini tukumbuke kua hakuna mkubwa kuliko mwingine sisi wote ni sawa.
• Najua kuna watu hawakufurahishwa ninyi kuitwa na mimi na kuna baadhi yenu mmetendewa isivyofaa.
• Maneno ninayoyasema najua hayatawafurahisha  wakubwa wenu ila mimi ndiyo mkubwa wenu wote na sababu kubwa ya kuwaita hapa ni kuwapa meno na kujitambua kuwa ni mabosi, tembeeni kifua mbele.

Dkt. Laurean Ndumbalo, Katibu Mkuu Ofisi ya Rais, Menejimenti ya Utumishi wa Umma alisema:-

• Mambo makubwa matatu mnayopaswa kuyatekeleza katika maeneo yenu ni moja; kuisoma, kuielewa na kuitafsiri kwa vitendo Ilani ya Chama cha Mapinduzi mfano tunaposema Elimu bure, hakikisheni katika maeneo yenu watoto wote wanaopaswa kwenda shule wanakwenda.
• Wajibu wenu wa pili ni kutembelea wananchi, kusikiliza kero za wananchi katika maeneo yenu na kuzitatua lakini kwa zile zilizo nje ya mamlaka yenu zipelekeni ngazi inayofuata.
• Jukumu lenu la tatu ni kuisemea Serikali ninyi mnapaswa kuyasemea yale yanayotekelezwa na Serikali kwa mfano mna wajibu wa kuwaambia wananchi katika maeneo yenu juu ya mambo makubwa yanayofanywa na Serikali mfano katika suala zima la miundombinu ikiwemo ya usafiri na usafirishaji, ujenzi wa barabara katika ngazi ya Miji, Wilaya na Mikoa kama ile inayounganisha mikoa ya Kigoma, Katavi na Rukwa, kuna miradi kama ule wa Flyover na madaraja jijini Dar es Salam.
• Kuna Ujenzi wa Meli mpya katika ziwa Ziwa Victoria, Nyasa na Tanganyika lakini tayari makandarasi wako kazini  kuanza Ujenzi wa daraja la Kigongo Busisi.
• Yasemeeni makubwa yanayofanywa katika sekta mbalimbali ikiwemo Afya, Elimu, mambo mengine mengi. Serikali inatoa bilioni 450 kila mwaka kwa ajili ya mikopo ya Elimu ya juu na kubwa zaidi sasa wanafunzi wana uhuru wa kuchagua vyuo wanavyotaka kwenda kwa sifa  stahiki tofauti na miaka ya nyuma ambako walikua wanalazimishwa kwenda TCU walikokua wanataka jambo ambalo Rais Magufuli alilikataa.
• Mambo ni mengi tutakesha nikisema niyaorodheshe lakini waambieni kuhusu ujenzi wa reli ya kisasa (SGR), upatikanaji wa dawa ambapo Serikali imeongeza bajeti ya afya kutoka shilingi Bilioni 31 mpaka Bilioni 270 ili kunusuru maisha ya Watanzania, vituo vya afya 300 vimejengwa na Hospitali 67 zimejengwa kwa wakati mmoja katika kipindi cha miaka mitatu ya Rais Magufuli na Serikali ya Awamu ya Tano, waambieni kuhusu kufufuliwa kwa Shirika la Ndege la ATCL, ndege sita tayari zimenunuliwa kwa fedha zetu wenyewe na nyingine mbili zinatarajiwa kuja kabla ya mwisho wa mwaka huu.

Chanzo: Idara ya Habari MAELEZO