Zahanati Nala watakiwa kuelimisha wananchi chanjo ya Korona kwenye maeneo yao

Imewekwa tarehe: October 6th, 2021

UONGOZI wa Zahanati ya Nala umetakiwa kujipanga kuwatembelea wananchi katika maeneo yao na kuwaelimisha ili waweze kuchanja chanjo dhidi ya ugonjwa wa UVIKO-19 unaosababishwa na virusi vya Korona.

Kauli hiyo ilitolewa na Afisa Muuguzi wa Halmashauri ya Jiji la Dodoma, Situ Muhunzi (aliyekaa kushoto pichani juu) alipoongoza timu ya wataalam wa Afya wa Jiji la Dodoma kutembelea Zahanati ya Nala jijini Dodoma.

Muhunzi alisema kuwa uongozi wa zahanati hiyo unatakiwa kujipanga vizuri na kuwafuata wananchi katika maeneo yao kuwaelimisha juu ya chanjo ya ugonjwa wa UVIKO-19 ili wafanye maamuzi baada ya kuwa na elimu ya kutosha. “Niwashauri kutoka na kuwafuata wananchi katika maeneo yao na kuwaelimisha. Wale watakao kubali kuchanjwa kwa hiari wachanjwe hukohuko. Utaratibu huu ni mzuri kwa sababu utawaondolea adha wananchi ya kufuata chanjo kituoni hapa” alisema Muhunzi.